Kryeministri polak Donald Tusk, kancelari gjerman Olaf Scholz dhe presidenti francez Emmanuel Macron pritet të takohen të premten në Berlin për të diskutuar për ndihmat për Ukrainën, shkruan Reuters.
Ky do të jenë takimi i parë i nivelit të lartë i “Trekëndëshit të Weimarit” – një platformë bashkëpunimi politik midis Gjermanisë, Francës dhe Polonisë e krijuar në vitin 1991- të cilët synojnë që takimi të jetë një shfaqje uniteti pas fërkimeve franko-gjermane mbi Ukrainën të cilat janë shndërruar në një grindje të hapur.
“Kam biseduar me presidentin se si ne i mobilizojmë partnerët tanë në Evropë”, tha Tusk në një intervistë të martën pas bisedimeve me presidentin e SHBA-së, Joe Biden në Uashington.
“Një samit i Trekëndëshit të Weimarit u thirr urgjentisht për të premten”, shtoi ai.
Takimi pason tensionin midis liderëve francezë dhe gjermanë për çështje të tilla si politika e Ukrainës, më e fundit e nxitur nga Macron që nuk përjashtoi dislokimin e trupave tokësore në Ukrainë.
Që nga formimi i qeverisë së re polake në fund të vitit të kaluar, ka pasur vetëm një takim të “Trekëndëshit të Weimarit” në nivel të ministrave të Jashtëm, por të tre vendet kanë shprehur dëshirën për të intensifikuar marrëdhëniet.
Udhëheqësit janë përpjekur të paraqesin formatin e Weimarit si mjet për forcimin e sigurisë evropiane, megjithëse nuk është aspak e qartë se shtimi i Tusk në diskutim do të ndihmojë në zbutjen e fërkimeve të mëparshme midis Scholz dhe Marcon.
Zyrtarët në qeverinë e Tusk kanë shprehur simpatinë për retorikën më të ashpër të Macron, me ministrin e Jashtëm polak Radoslaw Sikorski që tha së fundmi se prania e trupave të NATO-s në Ukrainë nuk është “e paimagjinueshme”. Një zyrtar i lartë gjerman tha se nuk priten vendime apo njoftime konkrete nga bisedimet, qëllimi i të cilave ishte të dërgonin një sinjal të ri uniteti.
j.l./ dita
