Nga data 1 korrik hyjnë në fuqi rregullat e reja të Bankës së Shqipërisë, të cilat kufizojnë kreditë për pasuri të paluajtshme.
Nga e marta cilido që do të aplikojë për të marrë një kredi për shtëpi, nuk do të ketë mundësi të marrë 100% të vlerës financim nga sektori bankar.
Konkretisht rregullat e reja parashikojnë që blerja e shtëpisë së parë në lekë, mund të financohet deri në 85 % të shumës, ndërsa shtëpia e dytë deri ne 80 %. Nëse kredia do të merret në valutë financimi është edhe më i ulët.
Rregullat e reja përfshijnë dhe këstet mujore.
Për huatë në lekë, kësti mujor i kredisë nuk mund të kalojë 35-40 % të të ardhurave mujore, ndërsa ato në valutë do të jenë 30-35%. Qëllimi është që të ruhen kredimarrësit nga ekzpozimi i luhatjes së kursit të këmbimit.
Ky interes shoqërohet me raste edhe me blerje objektesh pa nisur ende punimet në terren. Banka e Shqipërisë argumenton se të dhënat ekonomike nuk paraqesin ndonjë rrezik të mundshëm për ndonjë krizë në këtë treg.
Por vendimi për shtrëngim të kredive për banesa është një sinjal për të stepur sadopak rritjen e ndjeshme të çmimeve për pasuritë e patundshme që ka përfshirë të gjithë vendin.
Kjo është hera e parë që Banka Qendore merr një vendim të tillë për kufizimin të financimeve, ndaj mbetet për tu parë efekti i saj në treg.
