Metamorfoza është operacioni i koduar i Policisë së Shtetit që me urdhër të SPAK prangosi disa prej emrave që konsiderohen ndër më të rrezikshmit në botën e krimit në vend.
Vrasjet mafioze të grupeve kriminale në bashkëpunim me zyrtarë policorë dhe një prokuror tashmë të burgosur u zbuluan nga zbërthimi i komunikimeve në aplikacionin “Sky”.
Por eksperti i sigurisë, Ervin Karamuço thotë se shumë shpejt do të dalë një pjesë tjetër e përgjimeve, që do të implikojë edhe institucione të tjera si Doganat dhe Tatimet.
“Metamorfoza 2 do jetë edhe më e madhe, përfshin edhe institucione të tjera, Dogana, Tatimet. Do jetë një vetting për të gjitha institucionet shtetërore dhe më tej”, deklaroi Karamuço në “Top Talk”.
Jozyrtarisht është raportuar se në Shqipëri ka rreth 8,000 përdorues të aplikacionit “SKY”, që prej kohësh është çkoduar nga autoritetet ligjzbatuese evropiane. Këto të fundit, pjesën e komunikimeve që përfshijnë shqiptarë ia kanë dorëzuar SPAK-ut, dhe flitet se janë me mijëra faqe.
