Ambasadori britanik në Kosovë, Nicholas Abbott deklaroi se nuk e ka lexuar ende draft-statutin e Asociacionit të komunave me shumicë serbe të propozuar nga kryeministri Edi Rama.
Sipas tij, Kosova duhet t’i dëgjojë këshillat që vijnë nga miqtë dhe partnerët e saj në lidhje me situatën në veri.
“Kjo është një kohë e vështirë. Dhe mendoj se do të ishte plotësisht normale që Kosova të dëgjojë këshilla që vijnë nga miqtë dhe partnerët e saj. Shqipëria është një vend që është shumë afër Kosovës. Dimë që do të ketë bisedime qeveritare javën tjetër, jam i sigurtë që do të ketë shumë çështje në tryezë. Këshilla ime për qeverinë do të ishte që t’i dëgjojnë të gjitha këto, të gjejë rrugën e duhur përpara, por një (rrugë) që tregon mirëkuptim, për shqetësimet e miqve të saj”, tha ai.
Kujtojmë që kryeministri Rama deklaroi dje në një konferencë për shtyp se kishte propozuar një draft për Asociacionin.
Kreu i qeverisë tha se propozimi i tij për Asociacionin e komunave me shumicë serbe në veri të Kosovës, është kontribut për të vazhduar para me dialogun Prishtinë-Beograd.
“I kam përcjellë Macron dhe Scholz një draft të asociacionit është një draft i punuar nga ekspertë të nivelit më të lartë amerikanë dhe europianë prej kohësh gjë që është bërë pikërisht në rast se do vinte kjo ditë, kur palët dhe në këtë rast për mua i pakupshtueshëm është pozicioni i Kosovës, palët nuk po merren vesh as se kush duhet ta shkruajë këtë tekst. Ky është një dokument konfidencial që nuk pretendon të jetë zgjidhja ideale, por është një dokument i nivelit më të lartë ndërkombëtar që merr në konsideratë të gjitha arsyet për krijimin e asociacionit, tha Rama.
j.l./ dita
