Sakrificat e patreguara të ushtarëve myslimanë të Australisë (dhe me origjinë shqiptare) vijnë në një film

Sakrificat e bëra nga ushtarët myslimanë të Australisë janë një pjesë e patreguar e legjendës Anzac, sipas studiuesit Dr. James Barry.

Filmi i tij i ri, “Crescent Under The Southern Cross: Saluting Our Muslim Anzacs”, eksploron kontributin e dhënë nga këta ushtarë gjatë Luftës së Dytë Botërore.

“Ai thyen atë stereotip të muslimanëve si një grup i kohëve të fundit që ka mbërritur në Australi në 30 ose 40 vitet e fundit, dhe stereotipin e muslimanëve që nuk janë vërtet të interesuar të kontribuojnë në Australi”, tha Dr. Barry nga Universiteti Deakin për AAP.

Ushtarët vinin nga e gjithë bota, përfshirë Shqipërinë, Indonezinë dhe Malajzinë. Disa punonin si punëtorë ferme kur shpërtheu lufta, të tjerët ishin zhytës të evakuuar nga veriu kur Japonia pushtoi Indonezinë.

“Këta burra ishin aventurierë, ata vinin nga fshatra të vegjël deri në Australi, një vend që nuk ishte shumë mikpritës për ta në atë kohë dhe gjithashtu ishte i izoluar për ta”, tha Dr. Barry.

Fatet e tyre ishin të ndryshme: ndërsa disa u klasifikuan si alienë armik, të tjerë iu bashkuan batalioneve apo edhe Forcave Speciale.

Njerëzit e Forcave Speciale mund të depërtonin në linjat e armikut, sepse ata ishin në gjendje të përziheshin në komunitetet e Azisë Juglindore.

“Këto misione u krijuan për të shpërqendruar japonezët ose për t’u dhënë atyre përshtypjen se pushtimet australiane, veçanërisht në Borneo, ishin shumë më të mëdha se sa ishin në të vërtetë”, tha Dr. Barry.

Disa u kapën nga japonezët dhe u vranë ose vdiqën në luftime.

Rekrutët myslimanë paguheshin njësoj si të tjerët në Forcat Speciale, por zakonisht jetonin në zona të veçanta të kampit të ushtrisë, pasi nuk pinin alkool dhe ndiqnin një dietë hallall.

Një ushtar mysliman i paraqitur në film, Laver Xhemali, vinte nga një fshat i varfër në jug të Shqipërisë dhe duhej të largohej nga shtëpia në moshën 15-vjeçare për të fituar para për familjen e tij.

Ai udhëtoi për në Australi në vitin 1938 dhe kur shpërtheu lufta ai gënjeu për moshën e tij që të mund të regjistrohej.

Ai shërbeu në Afrikën e Veriut, ku u përpoq të dezertonte, përpara se të ridislokohej në Papua Guinenë e Re, ku luftoi me japonezët në xhungël të dendur në Betejën e Wareos.

“Gjatë gjithë historisë së tij ushtarake, ai tregon një mosbesim të shëndetshëm ndaj autoritetit, ndërsa gjithashtu i shërbente mirë njësisë së tij, ai përfundoi duke qenë në gjendje të vendosej në Australi pas luftës”, tha Dr. Barry.

Z. Xhemali u bë ushtari i parë musliman australian që kishte emblemën e gjysmëhënës dhe yllit në varrin e tij kur vdiq në vitin 1991 në moshën 70-vjeçare.

Dr. Barry bashkëpunoi me regjisorin Simon Wilmot në projekt dhe dyshja shpresojnë të sigurojnë një transmetim televiziv.

Filmi do të publikohet në faqen e internetit të Universitetit Deakin.