Shtyrje tjetër në Kushtetuese për Ballukun: Procedurë ligjore apo shpëtim politik? Çfarë ndodh nëse shtyrjet vazhdojnë

Nga Migena Aleksi

Gjykata Kushtetuese u mblodh përsëri për të shqyrtuar ankimimin e qeverisë mbi pezullimin nga detyra të zv/​kryeministres dhe ministres së Infrastrukturës, Belinda Balluku, por sërish nuk doli me vendim përfundimtar.

Trupa e gjyqtarëve tha se i duhet më shumë kohë për analizë, duke shtyrë përsëri çështjen për në një mbledhje të ardhshme.

Kjo është hera e dytë që Kushtetuesja vendos të mos japë një vendim konkret në lidhje me ligjshmërinë e pezullimit të Ballukut nga detyra, pasi seanca e mëparshme nuk prodhoi shumicë vendimmarrëse.

Trupa duhet të dalë me vendim lidhur me ankimin e kryeministrit kundër vendimit të Gjykatës së Posaçme, që e pezulloi ministren për shkak të dyshimeve në lidhje me tenderët publikë.

Këshilli i Rregullores, Mandateve dhe Imunitetit në Kuvend e ka shtyrë gjithashtu mbledhjen e tij, duke thënë se duhet të presë vendimin e Kushtetueses përpara se të shqyrtojë kërkesën e SPAK-ut për heqjen e imunitetit të Ballukut.

Këto shtyrje po krijojnë një ngërç procedural në institucionet e drejtësisë dhe politike të vendit.

Çfarë ndodh nëse Kushtetuesja vazhdon me shtyrje?

Nëse Gjykata Kushtetuese vazhdon të shtyjë sërish vendimin, procedurat e SPAK-ut mund të bllokohen përkohësisht.

Këshilli i Mandateve siguron alibinë të thotë se duhet të presë vendimin e Kushtetueses, duke e bërë të vështirë hapin e radhës për heqjen e imunitetit.

Rrjedhimisht SPAK duhet të presë. Ai nuk mund të kryejë veprime të plota hetimore ose arrestime ndaj një zyrtari që është edhe deputet.

A është kjo një manovër politike?

Përfaqësues të shumicës parlamentare thonë se Kushtetuesja ka nevojë për kohë për të interpretuar “çështjet komplekse ligjore që lidhen me imunitetin, për të shmangur pasoja juridike më të gjera”, sipas tyre.

Por kjo shtyrje e re duket pjesë e një koordinimi për ta bllokuar SPAK-un dhe për të mbrojtur nga hetimi figura të larta politike si Balluku.

Ndonëse nuk ka prova të drejtpërdrejta që Kushtetuesja po vepron me influencë politike, pasimet Gjykatë-Kuvend e kanë shndërruar këtë çështje në një test të fortë mbi pavarësinë e institucioneve të drejtësisë së re dhe rikthimin e ndikimit politik në proceset gjyqësore.

Balluku me vartësit e saj akuzohen se kanë paracaktuar fituesit në dy tenderë me vlerë 210 mln euro, atë të Tunelit të Llogarasë 190 mln euro dhe loti 4 i Unazës së Madhe 20 mln euro.

Ndërkohë, Balluku është vënë në hetim edhe për të 7 lotet e Unazës së Madhe, një projekt për të cilin janë prokuruar 45.9 miliardë lekë (450 milion euro).

—-

©️Copyright Gazeta DITA

Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, sipas Nenit 178 të Ligjit Nr/ 35/2016