SPAK firmos autorizimin, lejon familjarët të vizitojnë Veliajn në paraburgimin e Durrësit

Prokuroria e Posaçme ka firmosur autorizimin dhe ka lejuar familjarët të vizitojnë kryebashkiakun e Tiranës Erion Veliaj në paraburgimin e Durrësit.

Velian, i cili u arrestua në zyrën e tij më 10 shkurt, u dërgua në paraburgimin e Durrësit më 13 Shkurt, një ditë pasi GJKKO caktoi masën e sigurisë “arrest me burg” ndaj tij.

Për bashkëshorten e tij, Ajola Xoxa u caktua masa e detyrimit të paraqitjes. Edhe ndaj 5 biznesmenëve, GJKKO la të njëjtën masë sigurie, atë të detyrimit të paraqitjes.

Dëshmia e Veliajt në Gjykatë

Përgjatë seancës, Erion Veliaj është përplasur ashpër me prokurorin e çështjes Olsi Dado.

Fillimisht kryebashkiaku i ka kërkuar që prokurori të largohej nga çështja për shkak se ai ishte në konflikt interesi për shkak të një leje ndërtimi:

“Ti je në konflikt interesi, e ke personale me mua. Më je paraqitur dy herë për leje ndërtimi, ke marrë leje ndërtimi nga ana ime. Pasi ke mbetur i pakënaqur më ke thënë “do ta mbash mend”. Ke dy rrugë, ose të largohesh nga kjo çështje, ose të rreshtohesh me ndërtuesit e tjerë këtu”- mësohet t`i ketë thënë Veliaj prokurorit.

Por debatet kanë vijuar ndërkohë bëhet me dije se Erion Veliaj të ketë thënë: 

“Nuk më është shpjeguar edhe sot pse jam i arrestuar, unë jam kryetar bashkie që jam votuar nga populli i Tiranës. Kam bërë detyrën time. I kam hyrë në hak familjes se kam punuar edhe të shtunë edhe të diele edhe për festa kam punuar. Por mallkuar qoftë ai që punon në këtë vend, se bëhet objekt sulmi dhe gjendet në këtë situatë që jam unë sot. Vila në Qerret nuk është e jona, është e natyrshme që aty do gjenden lodrat e fëmijës tim dhe se bashkëshortja ime është fëmijë i vetëm dhe vjehrra ime dhe nuk e di pse duket kaq e panatyrshme që të jenë lodrat e fëmijës tek shtëpia e gjyshes. Bashkëshortja ime është kryezonjë dhe është përndjekur në mënyrë perverse”.

Në këtë moment ka ndërhyrë prokurori që i ka kërkuar të ruajë etikën në komunikim, dhe replika e Veliajt ishte: “pse të dogji, nuk përmenda emra dhe me këtë fjali kam parasysh median e politikën”.

Prokurori ka vijuar: “Po, sepse i ke shkruar në Facebook, këtu nuk je në Facebook ndaj përmbaju provave dhe fakteve. Të gjitha veshjet kishin kod unik dhe ishin veshje personale buzëkuq dhe bizhuteri”– tha prokurori i çështjes.

j.l./ dita