Struktura e Posaçme kundër Korrupsionit dhe Krimit të Organizuar (SPAK) ka reaguar pas vlerësimit nga Komisioni Europian për rezultatet e saj të vazhdueshme.
Komisioni Europian ka vlerësuar kontributin e SPAK-së gjatë takimit të 16-të të Nënkomitetit për Drejtësi, Liri dhe Siguri, që u zhvillua më 11 dhe 12 shkurt 2025, ndërsa theksoi rolin e saj të rëndësishëm në luftën kundër korrupsionit dhe krimit të organizuar.
Nga njoftimi i SPAK, Komisioni Europian ka theksuar se ky institucion ka kontribuar në krijimin e një historiku të besueshëm të rezultateve kundër krimit të organizuar dhe korrupsionit, duke e cilësuar këtë si një hap të rëndësishëm në rrugën e integrimit të Shqipërisë në BE.
Njoftimi i SPAK:
Komisioni Europian përshëndeti rezultatet e vazhdueshme të Strukturës së Posaçme kundër Korrupsionit dhe Krimit të Organizuar (SPAK), gjatë takimit të 16-të të Nënkomitetit për Drejtësi, Liri dhe Siguri, mes Bashkimit Europian dhe Shqipërisë, i zhvilluar më 11 dhe 12 shkurt 2025.
“Roli i SPAK-ut dhe pavarësia e tij në hetimin, ndjekjen penale dhe gjykimin e çështjeve komplekse të korrupsionit dhe krimit të organizuar ka qenë guri i themelit i reformës në drejtësi të vitit 2016, konsolidimin e vazhdueshëm të së cilës BE-ja e mbështet dhe promovon si pjesë përbërëse e negociatave të anëtarësimit të Shqipërisë. SPAK-u ka kontribuuar në përpjekjet e përgjithshme të Shqipërisë për të ofruar një historik të besueshëm rezultatesh kundër krimit të rëndë, krimit të organizuar dhe korrupsionit, përfshirë në nivel të lartë.“
i.b./dita
