Një tërmet me magnitudë 6.1 goditi mbrëmjen e së dielës provincën Balikesir në veriperëndim të Turqisë, duke shkaktuar vdekjen e të paktën një personi dhe shembjen e shumë ndërtesave.
Sipas autoriteteve turke, lëkundjet sizmike u ndjenë në disa provinca, përfshirë edhe qytetin më të madh të vendit, Stambollin, rreth 200 kilometra larg epiqendrës.
Pamjet televizive treguan ekipet e kërkim-shpëtimit duke punuar gjatë gjithë natës, ndërsa bënin thirrje për heshtje në mënyrë që të mund të dëgjonin për ndonjë shenjë jete nën rrënoja.
Ministri i Brendshëm, Ali Yerlikaya, njoftoi se një burrë 81-vjeçar humbi jetën pasi u nxor nga rrënojat nga ekipet e emergjencës në qytetin Sindirgi, ku ndodhej edhe epiqendra e tërmetit.
Deri tani, janë raportuar të paktën 29 të plagosur. Autoritetet vazhdojnë punën për vlerësimin e dëmeve dhe kërkimin e personave të mundshëm nën rrënoja.
Sipas ministrit, gjithsej janë shembur 16 ndërtesa, shumica prej tyre të braktisura dhe të pabanueshme.
Sipas Agjencisë së Menaxhimit të Fatkeqësive dhe Emergjencave të Turqisë (AFAD), tërmeti kishte një thellësi prej 11 kilometrash. Ndërkohë, Qendra Gjermane për Kërkime Gjeoshkencore (GFZ) e regjistroi tërmetin me magnitudë 6.19 dhe një thellësi prej 10 kilometrash.
Pas goditjes kryesore janë regjistruar disa pasgoditje, përfshirë një me magnitudë 4.6.
j.l./ dita
