Ish-kryetari i komunës së Bërxullës Ymer Marku është dënuar nga Gjykata e Tiranës për shpërdorim detyre dhe tjetërsim të pronave.
Marku është dënuar me 16 muaj burg nga Gjykata, por ka përfituar nga gjykimi i shkurtuar dhe pritet që të vuajë 10 muaj e 20 ditë burg.
Po ashtu në vendimin e Gjykatës thuhet se Markut i ndalohet për dy vite që të kryej funksione publike në vend. Bashkë më Markun, Gjykata ka dhënë dënimin dhe për Agim Locin, ish-kryeplakun e Bërxullës. Loci u dënua me 15 muaj burg, por nga gjykimi i shkurtuar iu bën 10 muaj burg. Më tej Gjykata ka vendosur që dënimin me burg për Locin ta pezullojë dhe ta lërë në masën e sigurisë shërbim prove për 6 muaj.
Po ashtu, të njëjtin vendim që është marrë për Locin, Gjykata ka dhënë dhe për ish-Përgjegjësi i Zyrës së Mbrojtjes dhe Menaxhimit të Tokës pranë Komunës Bërxullë, Kujtim Balliun. Balliu do të jetë për 6 muaj shërbim prove, ndërkohë që nuk i lejohet që për një vit të mbaj funksione publike.
Gjithashtu është dënuar dhe Kujtim Allmeta, i cili dyshohet se ka përfituar pronën prej 7500 metrash tokë arë, në mënyrë të paligjshme dhe më pas e ka shitur për 10.000.000 lekë. Allmeta është dënuar me 6 vite burgim, por nga gjykimi i shkurtuar i është lënë 4 vite burg. Dënimin me burg Gjykata e ka pezulluar dhe ka vendosur që Allmeta të jetë në shërbim prove për 4 vite.
Ymer Marku bashkë me tre persona të tjerë, si ish-kryeplaku Agim Loci, ish-Përgjegjësi i Zyrës së Mbrojtjes dhe Menaxhimit të Tokës pranë Komunës Bërxullë, Kujtim Balliu dhe Kujtim Allmeta kanë tjetërsuar dokumentet për të përfituar një tokë prej 7500 metrash në mënyrë të paligjshme. Këta persona në bashkëpunim me njëri-tjetrin, gjatë kohës kur shërbenin në ish-komunën Bërxullë, përmes dokumentave të falsifikuara kanë tjetërsuar disa sipërfaqe toke në zonën e Bërxullës.
Sipërfaqja e tokës pasi është tjetërsuar i është shitur kompanisë “Alko Impex Construction”, në pronësi të Arbër Abazit për 10 mln lekë të reja. Por sipas vendimin të Gjykatës, kjo tokë tashmë e sekuestruar do t’i kalojë shtetit.
Pothuajse të gjithë kryetarët e komunave kanë bërë gallatë me tokat e ish-pronarëve. Hysen Gashi në zonën e Arapjes, kanali i madh ka bërë çfarë ka dashur dhe u bë personazh i rëndësishëm për shumë vite në qytetin e Durrësit. Këta kryetar komune e kanë ndjerë veten pronarë të komunave të tyre dhe jo drejtues dhe administratorë duke zbatuar ligjet.