Tre fëmijë kanë humbur jetën si pasojë e shembjes së një objekti në fshatin Jabllanicë të komunës së Gjakovës.
Referuar autoriteteve shtetërore, mediat në Kosovë raportojnë se bëhet fjalë për shembjen e një objekti që nuk ka qenë i banuar.
Ka pasur përpjekje nga fshatarët që të nxirren fëmijët, por kjo nuk është arritur dhe se ekipi mjekësor ka konstatuar vdekjen e tyre.
“Më datë 1 shkurt 2025, rreth orës 22:50, jemi njoftuar se në fshatin Jabllanicë është rrëzuar pllaka e një shtëpie të pabanuar, duke zënë poshtë tre fëmijë. Në vendngjarje kanë dalë njësitë e nevojshme policore, si dhe ekipet e emergjencës, përfshirë ambulancën dhe zjarrfikësit. Personeli mjekësor ka konstatuar në vendngjarje vdekjen e viktimave. Lidhur me rastin, është njoftuar edhe prokurori i shtetit në koordinim me të cilin, aktualisht janë duke u ndërmarr veprimet e nevojshme hetimore”, ka deklaruar zëdhënësi i Policisë në rajonin e Gjakovës, Sheremet Elezaj.
Sipas raportit ditor të Policisë së Kosovës, objekti është shembur në rrethana të panjohura, ndërsa tre djemtë – dy 15 vjeç dhe tjetri 14 vjeç – kanë qenë brenda kur janë zënë nga pllaka.
Majori i Policisë së Kosovës, Milazim Lumi ka thënë për mediat lokale në Kosovë se objekti i shembur ka qenë ndërtesë e vjetër, e pabanuar, e mbetur pas luftës së vitit 1999 në Kosovë.
j.l./ dita
Përgjegjësi është pronari që nuk ka siguru objektin vetëm te shqiptarët pronat e tyre trajtohen si ata dojnë dhe jo si thotë ligji