Një ngjarje tragjike është regjistruar mbrëmjen e djeshme në Selanik, Greqi, ku një nënë bashkë me djalin e saj u gjetën të vdekur brenda një makinë që ishte zhytur në det.
Sipas autoriteteve gruaja 75-vjeçare dhe djali i saj 50-vjeçar kanë kryer vetëvrasje, nisur dhe nga kushtet në të cilat ata u gjetën brenda automjetit. Sipas mediave greke, dy personat e mbytur kishin mbushur makinën me thasë me rërë, kishin lidhur trupin me litar pas sediljeve dhe po ashtu kishin prangosur kyçet e duarve në timonin e makinës.
Ngjarja tragjike është shënuar të hënën rreth orës 14:03, ndërsa drama njerëzore u zbulua pak më vonë, kur zhytësit shkuan në fund të portit dhe panë të lidhur dy trupat e pajetë të të moshuarës dhe djalit të saj.
Sipas një banori të zonës, kjo është hera e tretë që në këtë pikë, njerëzit vendosin t’i japin fund jetës në të njëjtën mënyrë, pra të bien në det me makinën e tyre. Dëshmitar okular i asaj që ndodhi pasditen e së hënës ishte një burrë që në atë moment po notonte në det. Ai ka përshkruar se ka parë makinën që ka mbërritur në port, më pas ka ndaluar dhe pak sekonda më vonë ka ecur me shpejtësi dhe ka rënë në ujë.
“Jam i sigurt se ata ndaluan këtu për të vënë prangat pasi do ta kishin të pamundur të merrnin vendimin nëse do të lidheshin paraprakisht. Ata ranë, shtypën gazin dhe papritmas pashë makinën duke humbur në fund të detit . U trondita dhe shpejt kuptova se njerëzit nuk do të dilnin të gjallë, sado shpejt të vinte roja bregdetare. Makina u fundos në një kohë shumë të shkurtër”, ka përshkruar, dëshmitari okular i tragjedisë familjare.
Autoritetet raportojnë se familja po përballej me probleme pasi ata po kalonin një periudhë të vështirë pas vdekjes së dy anëtarëve të familjes. Dy vite më parë vëllai dhe djali 50-vjeçar i gruas i kishin dhënë fund jetës. Menjëherë pas ngjarjes tragjike, babai i familjes ka ndërruar jetë , duke mos besuar se çfarë kishte ndodhur me familjen e tij.
j.l./ dita
