Presidenti amerikan, Donald Trump, ka mbërritur në Skoci, ku pritet të zhvillojë bisedime me udhëheqësit evropianë dhe britanikë në përpjekje për të arritur një marrëveshje të re tregtare.
Trump mbërriti në Mbretërinë e Bashkuar në orët e vona të së premtes dhe pritet të takohet me kryeministrin britanik, Keir Starmer, si dhe me presidenten e Komisionit Evropian, Ursula von der Leyen.
Përpara nisjes nga Shtëpia e Bardhë, Trump deklaroi për gazetarët se do të diskutonte për marrëveshjen tregtare mes Uashingtonit dhe Londrës me Starmerin, duke shtuar se “ndoshta edhe do ta përmirësojmë atë”.
Ndërkohë, presidentja e Komisionit Evropian, Ursula von der Leyen, bëri të ditur se kishte zhvilluar një telefonatë “të mirë” me presidentin amerikan.
“Kemi rënë dakord të takohemi në Skoci të dielën për të diskutuar marrëdhëniet tregtare transatlantike dhe se si mund t’i mbajmë ato të forta”, shkroi ajo në rrjetet sociale.
Pas rikthimit të tij në Shtëpinë e Bardhë, Trump vendosi tarifa mbi importet nga vende të ndryshme të botës dhe i ftoi partnerët të negocionin marrëveshje dypalëshe me Shtetet e Bashkuara për të shmangur apo reduktuar barrierat e reja tregtare.
Në qershor, Mbretëria e Bashkuar dhe SHBA-ja arritën një marrëveshje tregtare që lehtëson qasjen e mallrave amerikane në tregun britanik. Por marrëdhëniet tregtare mes SHBA-së dhe Bashkimit Evropian kanë hyrë në një fazë të tensionuar.
Më herët gjatë këtij muaji, Trump njoftoi vendosjen e tarifave 30% mbi importet nga BE-ja duke filluar nga 1 gushti, çka ka nxitur reagimin e udhëheqësve evropianë.
Ata janë shprehur të gatshëm për negociata, por nuk kanë përjashtuar mundësinë e masave reciproke ndaj Uashingtonit.
j.l./ dita
