Shorti për ndarjen e banesave të reja për të dëmtuarit e tërmetit në Ndroq do të hidhet në muajin dhjetor. Bashkia Tiranës bën me dije se në datën 7 dhjetor, në orën ora 14:00, do të organizojë shortin për shpërndarjen e banesave të reja për familjet e prekura nga tërmeti në lagjen e re të Ndroqit.
Shorti publik për përzgjedhjen e njësive të reja të banimit, në objektet e ndërtuara në lagjen e re Ndroq, për sistemimin e subjekteve përfituese të programeve të rindërtimit me strukturën e banesës dhe përbërjen familjare do të hidhet pranë ambienteve të shkollës së mesme “Sadi Nuri”.
Procedura e hedhjes së shortit dhe përzgjedhjes së njësisë së banimit në objektet e reja, është një procedurë që do të bëhet përmes një shorteu të hapur dhe publik, në kuadër të procesit të rindërtimit, që më parë është afishuar dhe pranë njësisë administrative dhe faqen zyrtare të internetit të Bashkisë Tiranë.
Të pranishëm në hedhjen e shortit do të jetë një nga familjarët ose kur kjo nuk është e mundur një përfaqësues me prokurorë, ku nëpërmjet një procesi të hapur dhe transparent nga ana juaj do të bëhet përzgjedhja e njësisë së re të banimit.
Në rast se as qytetari që do të përfitojë banesë të re, apo përfaqësuesi i përzgjedhur prej tij, nuk paraqitet edhe pse ka marrë rregullisht njoftimin, atëherë të drejtën e përzgjedhjes e ushtron Kryetari i Komisionit, në prani edhe të subjekteve të tjera përfituese dhe rezultati i përzgjedhjes pasqyrohet në procesverbal në të cilin evidentohet e gjithë kjo procedurë.
Pas tërmetit, Bashkia e Tiranës në bashkëpunim dhe me qeverinë, nisën procesin e rindërtimit të banesave individuale, si dhe të pallateve të dëmtuara. Krahas shumë banesave të ndërtuara nga donacionet, Bashkia e Tiranës ndërtoi disa lagje të reja për banesa individuale në zonat rurale, si dhe lagjen e re tek zona e “5 Majit” dhe në Kombinat, për ato familje që para tërmetit jetonin në pallat. Gjatë kësaj kohe, Bashkia ka vijuar me dhënien e bonusit të qerasë për të gjitha familjet, gjer në marrjen e çelësave të banesave të reja, ndërsa shpërndau dhe grante për rikonstruksionin e banesave që kishin një shkallë më të vogël dëmtimi.
