Kreu i ri i diplomacisë amerikane, Marco Rubio, planifikon të udhëtojë në Izrael dhe shtetet arabe në mes të shkurtit, njoftoi të enjten Departamenti i Shtetit. Ky do të jetë udhëtimi i parë i Sekretarit të Shtetit të SHBA-së në rajon pas deklaratave të Presidentit Donald Trump për zhvendosjen e palestinezëve nga Rripi i Gazës këtë javë. Rubio do të marrë pjesë në Konferencën e Sigurisë së Mynihut në Gjermani dhe më pas do të udhëtojë në Izrael, Emiratet e Bashkuara Arabe, Katar dhe Arabinë Saudite nga 13 deri më 18 shkurt.
“Marco Rubio dhe e gjithë bota e dinë shumë mirë se Gaza nuk është një vend ku thjesht mund të ktheheni. Ne duhet të flasim seriozisht dhe besoj se presidenti (i Shteteve të Bashkuara) Trump ka filluar të flasë”, tha burimi i Departamentit të Shtetit , duke iu referuar dëmit kolosal që ka pësuar enklava palestineze në luftën që shpërtheu 16 muaj më parë.
Më herët dje, në Santo Domingo, Sekretari Amerikan i Shtetit tha se vendet që kritikojnë planin e Presidentit Trump për Rripin e Gazës duhet të paraqesin propozimet e tyre se si t’i japin ndihmë enklavës.
“Ka vende në rajon që kanë shprehur shumë shqetësime. Ne do t’i inkurajonim ata me një zgjidhje dhe përgjigje ndaj problemit”, tha Rubio duke folur për gazetarët në kryeqytetin e Republikës Domenikane.
Shtetet arabe dhe udhëheqësit palestinezë shprehën kundërshtimin e tyre të fortë ndaj Trump, sipas të cilit afërsisht 2 milionë banorët e Rripit të Gazës do të duhet të zhvendosen pas luftës shkatërruese që u shkaktua nga inkursioni i paprecedentë i Hamasit në sektorët jugorë të territorit izraelit më 7 tetor 2023.
Kreu i diplomacisë amerikane këmbënguli edhe një herë që Trump propozoi rindërtimin e zonës së vogël bregdetare që ai e përshkroi aktualisht si të pabanueshme. Donald Trump përmendi idenë e SHBA-së për të marrë kontrollin e Rripit të Gazës dhe banorëve të saj që shkojnë në Egjipt ose Jordani si Kajro ashtu edhe Amani e kundërshtuan kategorikisht propozimin të martën, pas takimit të tij në Shtëpinë e Bardhë me kryeministrin izraelit Benjamin Netanyahu.
j.l./ dita
