“Dëgjova protestuesit, hoqa dorë nga Litiumi”, Vuçiç vetëdeklarohet “presidenti më budalla në botë”

Presidenti i Serbisë, Aleksandar Vuçiç, ndodhet në Norvegji, ku po takohet me zyrtarë të lartë shtetërorë.

Gjatë konferencës për shtyp, presidenti e nisi bisedën duke komentuar ndeshjen me Kamerunin, por më pas ka nisur të flasë për luftën në Ukrainë.

“Putini përdor atë që ka, të tjerët atë që kanë, të gjithë përdorin gjithçka, nuk ka dashuri në luftë. Kur shumë menduan se lufta kishte mbaruar dhe se Ukraina po fitonte, rusët filluan të luftojnë më mirë. Do të jetë një luftë shumë e gjatë, dhe pres që dimri i ardhshëm, madje edhe tjetri, të jenë shumë të vështirë”, tha ai për konfliktin në Ukrainë, duke shtuar se “duhet të kuptojmë që kjo luftë nuk do të përfundojë shpejt”.

Vuçiç, ka thënë se i vjen keq që ka marrë vendimin që Serbia të braktisë minierat e litiumit dhe se për shkak të kësaj ai “ndihet si presidenti më budalla në botë”.

“Unë u vetëdeklarova presidenti më budalla në botë kur mora vendimin të heq dorë nga litiumi. Dëgjova protestuesit. Nuk e kuptoj fare pse protestuan para qeverisë. Po u drejtohem atyre. Dua t’i pyes a e kuptoni që po shkatërroni vendin tuaj”, shtoi ai.

Ai e ka fjalën për protestën e aktivistëve mjedisorë para ndërtesës së Qeverisë së Serbisë, kundër kërkimit të litiumit.

“Çmimi i litiumit sot është 82,500 dollarë për ton dhe rezervat tona të litiumit kapin vlerën e 100 miliardë”, vuri në dukje ai, duke shtuar se vetëm qyteti i Loznicës do të përfitonte 5 miliardë euro nga minierat e litiumit, por qytetarët e tij zgjodhën të besonin në teoritë e konspiracionit”. Madje sipas Vuçiç, udhëheqësit e protestës “u shpërblyen nga të huajt”, pa saktësuar cilët ishin këta.

Litiumi është një metal kryesor në industrinë e baterive, makinave elektrike, telefonave celularë, pajisjeve kompjuterike etj.