KOKAINA / Zbërthimi i “Sky ECC” zbulon shtëpinë e tmerreve në Serbi, viktimat ndaheshin copash në video-live

Nga torturat dhe vrasjet në Holandë dhe Serbi në një rrjet të paprecedentë korrupsioni në Belgjikë, mesazhet e nxjerra nga rrjeti Sky ECC kanë hedhur dritë në disa nga qoshet më të errëta të Evropës.

Sky ECC ishte një aplikacion i sigurt mesazhesh dikur i vlerësuar shumë nga baronët e drogës. Por, ai u godit nga hetuesit në vitin 2021.

Hetues nga Belgjika, Franca dhe Holanda tani po shqyrtojnë një gamë të madhe mesazhesh të dërguara brenda bandave të drogës dhe kanë filluar arrestimet.

“Ishte sikur ishim ulur në tavolinë me kriminelët”, tha Catherine De Bolle, drejtoreshë ekzekutive e Europol, agjencia e koordinimit të policisë së BE-së.

Antwerp njihet si porti kryesor i hyrjes në Evropë për kokainën nga Amerika Latine – 90 tonë u kapën vetëm vitin e kaluar. Vitin e kaluar, policia belge, duke gjurmuar kontrabandën e drogës në këtë port, pikasi e para një aktivitet të përqendruar në rrjetin e fshehtë të mesazheve. Më shumë se 48 persona u arrestuan më 9 mars 2021 dhe u kontrolluan 200 ambiente, pjesërisht falë provave në mesazhet e nxjerra nga të dhënat e Sky ECC.

Detektivët sot bien dakord se hetimi i Sky ECC shënoi një pikë kthese në luftën kundër bandave të drogës.

“Shtëpia e tmerreve”

Eric Snoeck, drejtor i përgjithshëm i Policisë Gjyqësore Federale të Belgjikës, i tha AFP se autoritetet kanë në dorë më shumë se një miliard mesazhe Sky ECC.

“Ne kemi përdorur një pjesë relativisht të vogël të provave në dispozicion”, tha ai. “Është një punë që është në vazhdim dhe do të duhen vite për t’u përfunduar”.

Që nga zbulimi, më shumë se 1200 persona janë arrestuar për t’u marrë në pyetje në Belgjikë dhe janë 510 dosje penale të hapura dhe të informuara nga të dhënat e Sky ECC.

Këtë javë, mesazhet e zbuluara në rrjetin e fshehtë i lejuan policisë të niste një operacion ndërkufitar për të çmontuar një “super-kartel” që mendohej se kontrollonte një të tretën e tregtisë së kokainës në Evropë.

Oficerët në pesë vende arrestuan 49 të dyshuar, duke përfshirë gjashtë baronë të dyshuar të drogës me bazë në Dubai.

Vetëm policia e Antwerp-it ka hapur 257 dosje çështjesh bazuar në provat e reja.

Hetimet po bëjnë përparim në gjurmimin e tregtarëve të drogës, por ato kanë treguar gjithashtu se sa thellë kanë depërtuar bandat në shoqërinë dhe ekonominë e Belgjikës.

Në shtator, kryeministri belg Alexander De Croo njoftoi përforcime për shërbimin hetimor të policisë dhe paralajmëroi se shtrirja e krimit të organizuar shtrihet shumë përtej porteve të vendit.

Dhe nëse shkalla e rrjeteve është marramendëse, dhuna e tyre është shqetësuese.

“Ata kanë importuar në Evropë sjellje që ne menduam se përdorej vetëm në Amerikën Latine”, tha Remy Heitz, prokuror i përgjithshëm në gjykatën e apelit të Parisit.

“Terror, vrasje, njerëz që ekzekutohen në video live dhe ndahen me shikuesit që qeshin. Kështu i menaxhojnë këto biznese”.

Snoeck përshkruan “një nivel dhune plotësisht të padëgjuar më parë” dhe citon zbulimin e kontejnerëve të transportit të pajisur si dhoma torture në Holandë.

“Për disa mijëra euro, apo për një kontratë që nuk u përmbush, ata vrasin pa hezitim – ndonjëherë pas orë torturash – njerëz me të cilët punonin dhe komunikonin disa orë më parë”, tha Snoeck.

Mesazhet me tekst të shkëmbyera në rrjetin e koduar i lejuan hetuesit të gjenin një “shtëpi tmerri” në Serbi pranë kryeqytetit Beograd, ku viktimat copëtoheshin dhe futeshin në një mulli mishi.

Përhapja e dhunës

Ndërsa shumica e figurave të larta të arrestuar deri më tani jetonin në Dubai, Ballkani Perëndimor është dëshmuar gjithashtu një pikë e nxehtë për bandat.

Të dhënat nga Sky ECC, të cilat u tregtuan nga firma kanadeze tashmë e zhdukur Sky Global, janë ndarë me autoritetet në 22 vende, duke përfshirë Kolumbinë dhe Brazilin.

Hetuesit që tashmë ishin përballur me “Mocro-Maffia” marokene-holandeze dhe “Ndrangheta Mafia” e Italisë jugore, tani e dinë se kartelet e Amerikës Latine janë implantuar në tokën evropiane.

“Jam shumë i shqetësuar”, i tha AFP një gjyqtar francez, duke folur në kushte anonimiteti. “Ne po e nënvlerësojmë rrezikun e këtyre rrjeteve në drejtim të destabilizimit të shtetit dhe përhapjes së dhunës në të gjitha anët e shoqërisë”.

Marrë nga France 24

j.l./ dita