Nga Fatma Diko
“Bimët janë si skulptura, ato janë gjithmonë në ndryshim dhe kanë detaje kaq të gjalla, duke plotësuar çdo lloj stili dekorimi”. E kemi hasur këtë përshkrim dhe në shkrimin e mëparshëm, mbi përdorimin e bimëve në hapësirat tona të banimit, por jo vetëm.
A ju pëlqen mendimi për ta rrethuar veten me bimë, por nuk dini nga të filloni?
Merrni parasysh stilin tuaj te arredimit dhe të jetesës. Sa i zënë jeni dhe sa kohë dëshironi të shpenzoni, duke u kujdesur për bimët? Kjo do t’ju tregojë shumë për llojin e bimëve që duhet të blini.
Merrni parasysh hapësirën tuaj; Sa dritë natyrale ka shtëpia juaj? A keni dritë të mjaftueshme për të gjitha llojet e bimëve? Nëse po, ku janë të orientuara dhomat dhe dritaret tuaja? (Dritaret jugore dhe perëndimore janë ideale për bimët që duan shumë dritë, ndërsa dritaret me pamje nga Lindja dhe Veriu mund të mos funksionojnë për disa bimë).
Këto bimë shtëpie për fillestarët do të përmbushin ëndrrën tuaj për të pasur një shtëpi të gjelbër!
FILLO THJESHTË
Mund të jetë ndoshta e lehtë të blesh çdo bimë në dyqan, por kur dekoroni hapësirën tuaj të brendshme me bimë, filloni thjeshtë. Blini disa bimë të lehta për t’u rritur dhe merrni kohën tuaj, duke mësuar se si të kujdeseni për to. Blerja e shumë bimëve pa bërë kërkimin më parë mbi kujdesin e tyre, mund të çojë në tharje të bimëve më vonë. Filloni me bimë, të cilat janë të lehta për t’u kujdesur.
FICUS LYRATA (LULE FIKUS)
Fikusi ka aftësi për të transformuar plotësisht një hapësirë. Duke qenë një bime me gjelbërim të përhershëm, do t’i japë ngjyrë ambientit tuaj gjatë gjithë vitit.
Do të duket veçanërisht mirë në hapësira të mëdha me tavane të larta, të ndriçuara mirë, por këto nuk janë karakteristika që duhet të na kufizojnë. Ju mund ta vendosni fikusin tuaj pranë një dritareje, në dhomën e gjumit, pranë divanit, ose në korridor. Merrni parasysh stilin e dhomës dhe zgjidhni një vazo që përshtatet me të.
MONSTERA DELICIOSA (LULE SHQIPONJA)
Monstera Deliciosa është një bimë shumë e njohur në dekorimin e brendshëm. Kjo bimë tërheq vëmendjen për gjethet e saj të mëdha.
“Lule Shqiponja” është një bimë shtëpie madhështore. Mund ta përdorni për të veshur një cep të shtëpisë tuaj, ose për të prerë disa gjethe dhe për t’i vendosur në një vazo për të zbukuruar një raft, ose pjesë të mobiljeve. Nëse e vendosni bimën pranë një pasqyre, do të arrini edhe thellësi më të madhe; një ide e shkëlqyer për të krijuar njëoaz të vogël jeshil.
Gjethet e saj në formë zemre do të veshin çdo cep të shtëpisë tonë, duke i dhënë asaj një ajër tropikal!
BONSAI GINSENG (LULE BONSAI)
Ambientet minimaliste janë ideale për bonsai. Këto lloj pemësh janë perfekte për hapësirat moderne, pasi ato shtojnë një prekje natyrore, por në të njëjtën kohë ato nuk e heqin minimalizmin apo elegancën. Pra, është një ide e shkëlqyeshme t’i përfshini ato në një dhomë minimale, por vetëm nëse mund të sigurojmë dritën që u nevojitet. Prandaj, ne gjithmonë duhet të kërkojmë një kënd të mirë për të vendosur bonsai. Një pjesë e bukur e mobiljeve, si një komo moderne, mund të jetë një vend i mirë për të vendosur bonsain tonë.
PHALANOPSI (LULE ORKIDE)
Orkide ekzotike, freskuese, të bukura dhe pak romantike, janë një nga lulet më luksoze. Dekorimi i shtëpisë tuaj me to është një mënyrë e mrekullueshme për të sjellë atë bukuri të lehtë dhe organike, që lulet e freskëta kanë aftësinë të bëjnë. Nga bluja dhe e bardha, tek purpurtat e thella, të pasura, orkidet vijnë në një larmi të habitshme ngjyrash. Disa ide për dekorimin e shtëpisë me këto lule të bukura, që nuk dalin kurrë nga moda për shkak të bukurisë së tyre.
ALOE VERA
Bimët e Aloe Verës janë të njohura për shumë përfitime shëndetësore, kujdes për lëkurën etj. Por a e dini se ato janë po aq të dobishme nëse përdoren si bimë dekorative të brendshme në hapësirat tuaja?
Jepini hapësirave tuaja ngjyrën e gjelbërimit dhe freskisë, duke instaluar vetëm Aloe Vera si bimë për arredimin e ambienteve tuaja. Ato janë mjaft të lehta për t’u rritur, bëjnë një trokitje mbresëlënëse kudo që të vendosen, pastrojnë ajrin dhe thjesht ofrojnë një pamje miqësore me mjedisin për ambientet tuaja moderne bashkëkohore.
Bëni kujdes me përzgjedhjen e vazove
Bimët dhe vazot duhet të përputhen në bazë të karakteristikave të tyre vizuale. Për më tepër, kombinimi i bimës dhe vazos së bashku duhet t’i përshtatet dekorit të shtëpisë tuaj.
Ju mund të keni bimën më të bukur, por nëse e vendosni në një vazo që nuk i vë në pah bukurinë e saj, do të kalojë pa u vënë re!
