“Na është dashur të rishikojmë planet sa i takon efikasitetit. Duke qenë se kemi një fushë ajrore në Gjirokastër, infrastrukturë të ndërtuar dhe meqenëse në Shqipëri s’po zhvillohet vetëm turizmi bregdetar, aeroporti i jugut është menduar në zonën e Gjirokastrës dhe ti shërbejë gjithë zonës së jugut”, tha ministrja e Infrastrukturës dhe Energjisë.
Sa i takon infrastrukturës rrugore, Balluku, njoftoi në konferencë se këtë vit dorëzohen Unaza e Madhe e Tiranës dhe Rruga e Arbrit. Ndërsa dy veprat e tjera tuneli i Llogarasë dhe Thumanë-Kashar, mbyllen në 2024 e do jenë me pagesë.
Nga ana tjetër qendra e monitorimit të trafikut do të kryejë një rol tjetër që ka të bëjë me akset që do të vendosen në sistemin e pagesës siç është rasti i Tunelit i Llogorasë dhe Korridori Blu – u shpreh ministrja. Baypass-i i Tiranës dhe zgjerimi i autostradës Tiranë-Durrës janë dy projektet që pritet të startojnë gjatë këtij viti.
“Brenda vitit 2024 parashikojmë të hapim fazën e parë dhe ndoshta të dytë të zgjerimit që shkon nga Tirana në Vorë. E para është Tiranë – Kthesa e Rinasit dhe e dyta nga kthesa Rinas – Vorë” – thekson kreu i ARRSH.
Sa i takon hekurudhave, po vijon puna për hekurudhën Tiranë-Rinas-Durrës, si dhe është miratuar financimi për Durrës-Rrogozhinë. Kurse për hekurudhën Vorë-Hani i Hotit, po bëhet gati dokumentacioni, për të nisur me fazat e tjera të projektit.
p.c. / dita
