Qeveria e Katarit ka njoftuar se do zvogëlojë orët e punës për zyrtarët dhe një pjesë të qytetarëve gjatë zhvillimit të Kupës së Botës, me qëllim reduktimin e trafikut. Veç orëve të punës, për nxënësit e shkollave do shkurtohet orari i mësimit, me qëllim që afro 1 milionë tifozë të mos kenë vështirësi në lëvizje.
Nga 20 nëntori deri në 18 dhjetorin e këtij viti, në Katar do organizohet turneu i Kupës së Botës në të cilën do marrin pjesë 32 skuadra.
Megjithë kritikat e shumta në lidhje me sjelljen e tifozëve dhe humbjet e jetëve të punëtorëve për ndërtimin e stadiumeve, sërish Katari duket gati për të pritur një nga eventet më të mëdha në botë sa i takon futbollit.
Nisma e fundit për shkurtimin e orëve të punës dhe orarit në shkolla është konfirmuar zyrtarisht nga qeveria e Katarit. Një zëdhënës zyrtar tha pas një takimi të kabinetit se vetëm 20 përqind e stafit të qeverisë do të priten në zyra nga 1 nëntori deri më 19 dhjetor dhe stafi do të punojë vetëm katër orë në ditë. Nga 1 nëntori deri më 17 nëntor, orët e mësimit do të reduktohen, duke hapur shkollat nga ora 7:00 e mëngjesit deri në mesditë dhe më pas studentët do të jenë me pushime nga 18 nëntori deri më 22 dhjetor. Autostrada kryesore Corniche përgjatë bregdetit të Dohas do të jetë e mbyllur për të gjitha makinat nga 1 nëntori. Një zonë kryesore e tifozëve është duke u ndërtuar përgjatë rrugës.
o.j/dita
