EMRAT: RENEA blindon Durrësin, shtatë persona vihen në pranga

Një operacion policor është zhvilluar ditën e sotme në Durrës.

Në kuadër të këtij aksioni, policia bëri me dije se janë arrestuar shtatë persona, tre prej tyre të cilësuar me rrezikshmëri të lartë.

Në pranga janë vënë Xhevdet Plaku, Flobens Meçja, Voltan Xhani, Jugert Xhani dhe tre persona të tjerë të cilët akuzohen për veprat penale “Moskallëzimi i krimit” dhe “Përkrahja e autorit të krimit”.

Xhevdet Plaku i njohur dhe si “Akili”, u arratis në janar të këtij viti nga burgu i Ankonës në Itali, ku po vuante dënimin për trafik droge.

Ai vu në pranga në një restorant në Gjirin e Lalzit, ndërsa gjatë kontrollit iu gjet një armë zjarri pistoletë me fishek në fole gati për qitje.

Në një deklaratë për mediat, policia e Durrësit bëri me dije se kishin marrë informacione se një grup personash po qëndronin në ambientet e një restoranti në Gjirin e Lalzit në Durrës dhe se ishin të armatosur.

Forcat speciale kanë ndëryrë në mënyrë të menjëhershme dhe kanë bërë të mundur arrestimin e tyre.

Flobens Meçja alias Gega alias Drini, 43 vjeç ishte shpallur në kërkim pasi në korrik të 2024, GJKKO i ka caktuar masën e sigurisë “Arrest në burg”, për veprat penale “Organizata kriminale”, “Kryerja e veprave penale nga grupi i strukturuar kriminal” dhe “Sigurimi i kushteve dhe i mjeteve për të kryer vrasje”.

Gjatë kontrollit, këtij shtetasi iu gjetën dy dokumente identifikimi të falsifikuara dhe 1 armë zjarri pistoletë gati për qitje.

Voltan Xhani, 39 vjeç, ishte shpallur në kërkim pasi në shtator të 2024, Gjykata e Shkodrës, i ka caktuar masën e sigurisë “Arrest në burg”, për veprat penale “Trafikimi i mjeteve motorike” kryer në bashkëpunim dhe “Sigurimi i kushteve dhe i mjeteve për të kryer vrasje”.

Jugert Xhani, 35 vjeç, ishte në kërkim për veprat penale “Prodhimi dhe mbajtja pa leje e armëve luftarake dhe e municionit”, “Moskallëzimi i krimit” dhe “Përkrahja e autorit të krimit”.

Gjatë kontrollit iu gjetën një armë zjarri pistoletë dhe municion luftarak.

Gjatë operacionit, janë sekuestruar në cilësinë e provës materiale, shuma parash, euro dhe sende të tjera.

j.l./ dita