Marrëveshja e paqes në Gaza, Hamasi dorëzon pengjet e para. Trump mbërrin në Izrael

Në një zhvillim të rëndësishëm dhe të shumëpritur, 20 pengje izraelite do të lirohen sot përmes korridorit Netzarim, si pjesë e një marrëveshjeje shkëmbimi mes Izraelit dhe përfaqësuesve palestinezë.

Izraeli ka pranuar të lirojë 1,950 të ndaluar dhe të burgosur afatgjatë palestinezë në këmbim të këtyre 20 pengjeve. Dy prej pengjeve izraelite ndodhen në gjendje kritike shëndetësore.

Në një gjest simbolik, Kryeministri Benjamin Netanyahu ka përcjellë një shënim të shkruar me dorë për pengjet, ku thuhet: “Mirë se erdhët përsëri!”

Ndërkohë, turmat janë mbledhur në Sheshin e Pengjeve në Tel Aviv dhe qytete të tjera, duke pritur me ankth dhe emocione kthimin e pengjeve.

Nga ana tjetër, të burgosurit palestinezë janë parë duke hipur në autobusë nën masa të rrepta sigurie, ndërsa automjetet e Kryqit të Kuq janë në gatishmëri për të siguruar transferimin human dhe mjekësor.

Po ashtu, ka mbërritur ndihma e parë humanitare për banorët e uritur të Gazës, shënuar si një tjetër hap i rëndësishëm në këtë ditë me zhvillime dramatike.

Ngjarja po ndiqet nga afër nga komuniteti ndërkombëtar, mes shpresave për lehtësim tensionesh dhe një përparim të mundshëm drejt qetësimit të situatës në rajon.

Trump mbërrin në Izrael

Presidenti i SHBA-së, Donald Trump ka mbërritur në Izrael për një vizitë që do të zgjasë më pak se katër orë pas armëpushimit të arritur në Gaza, transmeton Anadolu.

Avioni i Trumpit mbërriti në aeroportin “Ben Gurion” në afërsi të Tel Avivit.

Pas armëpushimit të arritur në Gaza, Trump mbërriti në aeroportin “Ben Gurion” ku u prit me ceremoni zyrtare. Ai u prit nga presidenti izraelit Isaac Herzog dhe kryeministri Benjamin Netanyahu, së bashku me shumë ministra dhe zyrtarë.

Trump do të niset nga aeroporti “Ben Gurion” për në Kudsin Perëndimor, si pjesë e vizitës së tij në Izrael, e cila do të zgjasë më pak se katër orë.

Ai do t’i drejtohet Parlamentit izraelit (Knesset) në Kudsin Perëndimor dhe më pas do të udhëtojë për në Tel Aviv për t’u takuar me pengjet izraelite dhe familjet e tyre.

Trump do të niset nga Izraeli në orën 13:00 sipas orës lokale dhe do të udhëtojë për në Egjipt për të marrë pjesë në Samitin e Paqes në Sharm el-Sheikh, ku do të diskutohet për marrëveshjen e armëpushimit në Gaza.

j.l./ dita