Njihni “kukullën e gjyshit” në RTSH

Faqja e njohur investiguese Prapaskena ka nisur një hetim mbi aferat dhe pazaret në RTSH, ku flitet për një “kukull” dhe për një “gjysh”.

Radiotelevizioni Shqiptar është padyshim një nga rrangallat, që vijon të financohet pa pushim për 30 vite me radhë. Pa u përshtatur, pa u transformuar, pa u reformuar, pa u bërë një adresë e besueshme për opinionin shqiptar.

Një nga ato institucione që njësoj si thithlopa, ka duruar në mënyrë të pashoqe zagushinë e politikës dhe duke ngrënë nga paratë e shqiptarëve, ka ecur në rrugën monotone të ripërtypjes së kakës që ia jep falas partia e radhës.

E kemi këtë të drejtë të flasim me këtë gjuhë, sa kohë që për të paguajmë – ose na i marrin paratë pa patur fare dëshirë.

Ndër politikanët që është ankuar dikur më së shumti për këtë institucion parazitar, që nuk justifikon për asnjë çast të vetëm lekët që u merr njerëzve, është kryeministri aktual, Edi Rama. I cili e ka patur premtim të vetin transformimin e RTSH-së. Por si shumë premtime mbetën atje ku u thanë.

Ka një kontraditë shumë të thellë mes të ardhurave që ky Tv ka dhe produktit final që prodhon dhe shikueshmërisë për opinionin publik, pasi, vit pas viti pas ‘90-ës, torta e shikueshmërisë së RTSH ka ardhur gjithmonë duke u rudhur sa ka zbritur nën 10 % sot. Kriza e drejtimit në vitet e fundit ndryshoi dhe ligjin.

Ka interes publik që të flitet për ndryshimin e këtij televizioni, që quhet publik, e të cilin kryeministri i vendit, i cili na merr për këtë kanal mbi 25-30 milionë euro, as nuk e sheh fare. Kështu deklaroi të paktën para disa kohësh në një intervistë dhe shpresojmë se nuk e ka bërë këtë nga frika se mos binte në sy si Demode.

Të mos flasësh për ndryshimin e domosdoshëm e këtij institucioni, më së paku dëshmon paaftësi. Dhe kjo paaftësi për të zgjidhur një punë të vetme ashtu siç duhet, është targa historike e kësaj qeverie, e cila përpara se të lidhë kokën për punë drejtorësh, do të ishte mirë që të spërkaste me pak “rilindje”, çezariane po qe nevoja, edhe këtë karakatinën RTSH.

Për t’ia kthyer atë publikut meqë e paguan, ose po qe se jo ta integronte në treg dhe aty të provohej.

Qeveria, do të duhet të paktën të na sqaronte për qëllimin pse mbahet ende një institucion i tillë në këmbë, për çfarë shërben dhe çfarë vlere ka. Televizioni, edhe kur ai është publik apo shtetëror, nuk është shërbim i detyrueshëm apo i domosdoshëm për njerëzit. Ai bën pjesë tek ofertat që i bëhen qytetarëve dhe kundrejt ofertës ka një kundërpërgjigje që vjen sipas vlerësimit dhe vullnetit të klientit.

Por kur paratë për këtë gjë të paemër për nga funksionet në raport me kohën, i merr tinëz përmes faturës së dritave, atëherë kjo është njësoj sikur t’u kërkosh njerëzve të paguajnë pafundësisht një pacient, të cilin në vend që mjeku ta shërojë, e dozon pafundësisht me arsenik.

E mira e të gjithëve e do që RTSH-ja të ndryshojë dhe të bëhet vërtet diçka përtej llafeve që janë thënë përherë. Përmbajtja nëse është e mundur, por nëse jo, modeli i menaxhimit.

Politizimi i RTSH-së, ja si ndahet haptazi “torta” e Këshillit Drejtues 

Në mars 2022 përfaqësues të shumicës dhe pakicës parlamentare në Komisionin për Edukimin dhe Mjetet e Informimit Publik, kanë pranuar haptazi politizimin e Radio Televizionit Shqiptar duke kërkuar përfaqësim politik në Këshillin Drejtues të këtij institucioni publik.

Opozita këmbënguli që dy anëtarët e rinj që do të zgjidhen në këtë këshill t’i takojnë asaj, pasi nuk i është dhënë mundësia e përfaqësimit për shkak të mungesës në Kuvend gjatë legjislaturës së shkuar.

Edhe pse ligji ia njeh të drejtën e propozimit të kandidaturave shoqatave të medias, universiteteve dhe organizatave të shoqërisë civile, mënyra e përzgjedhjes i ka lënë në dorë politikës të bëjë pazaret e saj.

Çfarë thotë procesverbali? Deputeti socialist Petro Koçi, si drejtues i mbledhjes në atë kohë, njoftoi se bëhej fjalë për dy vende vakante që sipas tij, i takonin njëri shumicës dhe tjetri pakicës parlamentare.

“Kemi dy vende vakante në këshill, Petrit Ruka i ndarë nga jeta, i propozuar nga mazhoranca dhe Thanas Gogo që ka dhënë dorëheqjen i propozuar nga pakica,”- tha ai.

Por deputeti i Partisë Demokratike, Luciano Boçi kërkoi që të dy vendet t’i lihen opozitës, si balancim pasi sipas tij 8 anëtarët aktualë në këshill i kishte zgjedhur mazhoranca.

“Këto dy vende janë përfaqësues të mbrojtur e të mbështetur nga pakica dhe nga shumica apo profesionistë që i nënshtrohen një procedure të rregullt?” pyeti Boçi, ndërsa kërkoi që të kishin një konsensus si në rastin e AMA-s.

Boçi kërkoi që të bëhej një analizë se kush i ka mbështetur anëtarët aktualë të KDRTSH-së, duke pretenduar se PD ka të drejtë të zgjedhë dy anëtarët e rinjë.

“Pse duhet ta ndajmë një shumica e një pakica, le t’i marrë të dy pakica sepse ne nuk kemi qenë në parlament, nuk kemi përfaqësues të mbrojtur,” tha ai, duke e cilësuar si të drejtë të opozitës.

Të njëjtin qëndrim mbajti dhe deputetja tjetër e PD-së, Ina Zhupa, e cila e cilësoi “të kapur nga mazhoranca” KDRTSH-në.

“PD ka qenë e qartë në procesin e përzgjedhjes së KDRTSH, që në krye të herës kur u kthyem në parlament,” tha ajo, duke i kërkuar kolegëve socialistë që të pranohet me një “parim xhentëllmenësh” që dy anëtarët e rinj t’i lihen PD-së. “Sot KDRTSH është i kapur dhe përfaqëson në mënyrë të hapur vetëm mazhorancën,” shtoi Zhupa.

Petro Koçi u përgjigj se nuk mund të zgjidhej dot çështja e procedurave të ndjekura nga Kuvendi kur PD-ja ishte në bojkot, por ai shtoi se pretendimi i saj “në planin moral është një pretendim që vlen të dëgjohet”.

Gjithsesi, Koçi e cilësoi krejt formal parashtrimin e bërë se dy vendet vakante ishin të caktuar një për PD-në dhe një për PS-në ,duke e shtyrë për momentin e përzgjedhjes së emrave debatin për mbështetjen politike të kandidatëve të rinj.

Opozita gjithashtu shfaqi rezerva për mënyrën si ka funksionuar Këshilli Drejtues i RTSH-së, duke e konsideruar në shkelje të ligjit zgjedhjen e drejtorit të kohës.

Vakancat në këtë këshill janë kthyer gjithmonë në përplasje politike, edhe pse ligji i kërkon televizionit publik që të jetë i paanshëm politikisht në punën e tij.

Në maj 2021 u plotësuan katër vakanca, të zgjedhura në një parlament të dominuar nga mazhoranca socialiste dhe një opozitë parlamentare e kontestuar pas largimit të PD-së nga Kuvendi.

Edhe Bordi i Autoritetit të Medias Audiovizive iu nënshtrua një përzgjedhje tërësisht politike të kandidaturave të ardhura në këtë komision. Me procedurën e eleminimit PS dhe PD lanë në listë emrat e tyre të preferuar.