Elena Pici, Sekretarja e Përgjithshme në Ministrinë e Brendshme ka dhënë dorëheqjen këtë të enjte.
Përmes një statusi në faqen e vet në Facebook Pici sqaron pozicionin e saj, teksa thekson se në 2 vitet në krye të detyrës së rëndësishme në Ministrinë e Brendshme ka kryer me përgjegjshmëri të plotë, me profesionalizëm dhe integritet.
Pici hedh poshtë ato që i quan thashetheme të mediave teksa shprehet se vendimi për t’u larguar nga kjo detyrë ishte tërësisht personal.
“Për këdo që do të besojë faktet dhe jo thashethemet, vendimmarrja për zhvillimin tim të karrierës në sektorë të tjerë është krejtësisht një vendim personal dhe nuk përkon me asnjë ngjarje apo çështje tjetër sikundër është raportuar në disa media. Çdo spekulim dhe insinuatë që ngrihet, mund t’i shërbejë interesave të të tjerëve, por kurrsesi jo të vërtetës”, shprehet ish-zyrtarja.
