Një tërmet i fuqishëm me magnitudë 6.1 të shkallës Rihter ka tronditur mbrëmjen e së hënës rrethin Sındırgı, në provincën Balıkesir të Turqisë, duke shkaktuar panik, dëme materiale dhe frikë masive në disa qytete të mëdha të vendit.
Lëkundja kryesore është regjistruar rreth orës 22:49 sipas orës lokale, me një thellësi vetëm 5.99 kilometra, çka e bën atë një tërmet të cekët dhe për pasojë, shumë të ndjeshëm në një zonë të gjerë. Dridhjet janë ndier fuqishëm në Izmir, Bursa, Stamboll, Tekirdağ dhe në disa pjesë të Egjeut Lindor, duke detyruar mijëra qytetarë të dalin në rrugë.
Sipas autoriteteve vendore, disa ndërtesa të vjetra në Sındırgı janë shembur pjesërisht, ndërsa raportohet për disa persona të lënduar lehtë që kanë kërkuar ndihmë mjekësore për shkak të rrëzimeve apo panikut. Ekipet e shpëtimit dhe zjarrfikësit u dërguan menjëherë në zonë për të kërkuar të mbijetuar nën rrënoja dhe për të vlerësuar dëmet strukturore.
Forcat e emergjencës AFAD kanë ngritur qendra të përkohshme strehimi, ndërsa banorëve u është kërkuar të qëndrojnë larg ndërtesave të dëmtuara dhe të shmangin përdorimin e telefonit për të mos ngarkuar rrjetet.
Sipas vëzhgimeve sizmike, tërmeti i Balıkesirit u pasua nga disa pasgoditje më të vogla, por të ndjeshme në zonat përreth. Gjeologët turq paralajmërojnë se pasgoditjet mund të zgjasin për disa ditë, duke kërkuar nga qytetarët kujdes të shtuar.
Ekspertët kujtojnë se rajoni është një zonë me aktivitet të lartë sizmik, pjesë e thyerjes së Anadollit Verior, që është ndër më të rrezikshmet në Mesdhe. Vetëm gjatë 80 ditëve të fundit, janë regjistruar mbi 12,000 lëkundje, përfshirë 45 tërmete me magnitudë 4–5 ballë, çka tregon një aktivizim të dukshëm të pllakave tektonike në këtë sektor.
Në gusht të këtij viti, një tjetër tërmet 6.1 ballë në të njëjtin rajon shkaktoi vdekjen e një të moshuari dhe shembjen e dhjetëra ndërtesave të vjetra, duke nxitur debate të reja për rrezikun e sigurisë strukturore në qytetet e Turqisë.
Qeveria turke ka aktivizuar menjëherë planin kombëtar të menaxhimit të fatkeqësive, ndërsa ministri i Brendshëm dhe ai i Shëndetësisë ndodhen në terren për të koordinuar operacionet e ndihmës. Në disa zona të Balıkesirit dhe Izmirit janë ndërprerë energjia elektrike dhe shërbimet telefonike, ndërsa rrugët janë bllokuar për kalimin e mjeteve të emergjencës.
Në stacionet televizive turke, pamjet tregojnë qytetarë të mbledhur në sheshe, parqe dhe stadiume, të mbështjellë me batanije, duke pritur në ankth orët e para pas tërmetit.
o.p. / dita
