Ish-kryebashkiaku i Tiranës, Erion Veliaj, ka lënë ambientet e paraburgimit në Durrës dhe ka mbërritur në kryeqytet, ku do të marrë pjesë në seancën që do të zhvillohet në Gjykatën Kushtetuese. Gjatë shoqërimit të tij nga forcat e policisë, disa qytetarë të pranishëm në zonë janë dëgjuar teksa komentojnë daljen e Veliajt nga burgu.
“Del Lali Eri sot!”, dëgjohet të thotë një burrë, ndërsa një tjetër i përgjigjet: Lali Eri do dali sot e? Ah sa mirë!.
I prangosur dhe nën shoqërinë e masave të sigurisë, Veliaj sapo ka zbritur nga fugoni i policisë dhe ka përshëndetur i buzëqeshur gazetarët, të cilët po ndjekin hap pas hapi seancën e sotme.
Veliaj ka shprehur ‘dëshirën’ për të marrë pjesë vetë në seancë, ndërsa më 20 tetor gjykata ka vënë në dijeni edhe Prokurorinë e Posaçme (SPAK) për zhvillimin e saj. Për këtë arsye, Gjykata kërkoi nga Drejtoria e Burgjeve marrjen e masave për shoqërimin e tij nga paraburgimi i Durrësit, ku ndodhet prej muajit shkurt, si edhe SPAK-un.
Seanca e parashikuar ka në fokus shqyrtimin e ankimit të tij kundër vendimit për shkarkim nga detyra, si edhe dekretin e Presidentit Bajram Begaj për shpalljen e zgjedhjeve të pjesshme në kryeqytet.
Ndërkohë, punonjësit e Gjykatës Kushtetuese janë parë duke bërë parapërgatitjet për zhvillimin e seancës. Në një video të publikuar, ata shfaqen teksa testojnë mikrofonat dhe kamerat në sallë, mes batutash dhe të qeshurash, për t’u siguruar që gjithçka të jetë gati për procesin e sotëm.
Mësohet se gjatë seancës nuk do të lejohen kamerat e televizioneve brenda sallës, ndërsa pamjet do të transmetohen nga vetë Gjykata Kushtetuese përmes regjistrimeve zyrtare.
j.l./ dita
