Një person është vrarë dhe një tjetër është plagosur pas të shtënave me armë zjarri në Prishtinë, mbrëmjen e 25 marsit.
Policia e Kosovës tha se rasti është raportuar në orën 22:25, ku dy persona të armatosur dhe të maskuar kanë shtënë me armë zjarri në drejtim të dy viktimave meshkuj dhe si pasojë njëri nga viktimat ka ndërruar jetë në Qendrën Klinike Universitare të Kosovës.
Personi i dytë që mbeti i plagosur, sipas autoriteteve, është duke marrë trajtim mjekësor.
“Rreth orës 22:30, kemi pranuar informatën për të shtëna me armë në rrugën ‘Rrustem Hyseni’ në Prishtinë, ku dyshohet të jenë lënduar dy persona të cilët janë dërguar për tretman mjekësor”, u shpreh zëdhënësja e Policisë së Kosovës.
Motivet për këtë ngjarje ende nuk dihen, por kjo është vrasja e tretë që ka ndodhur në Kosovë në ditët e fundit.
Më 24 mars, Vushtrria u trondit sërish nga një ngjarje e rëndë. Një grua 42-vjeçare u vra në fshatin Stanoc, ndërsa autori i dyshuar i krimit, 58 vjeç, më pas vrau veten.
j.l./ dita
