Kopshtit Zoologjik të Tiranës iu shtuan 140 pemë të reja, dhuratë e Vodafone Albania për qytetin. Kreu i Bashkisë së Tiranës, Erion Veliaj tha se e vlerëson shumë këtë gjest domethënës për kryeqytetin.
“Asnjë s’ia del dot vetëm, kështu që sot kemi një ndihmë prej 140 pemësh të rritura. E vlerësoj shumë, sepse ka rëndësi edhe dhurata që merr. Vodafone Albania përfaqëson realisht një qytetari moderne, të njerëzve që dinë të jenë profesionistë në punë, por e kuptojnë se fatin e kanë lidhur me të tjerët, e kanë lidhur me familjen, me qytetin, me pastërtinë, me gjelbërimin. Shumë faleminderit për ndihmën”, u shpreh Veliaj.
Ai solli në vëmendje se vjeshta është periudha më e mirë për të mbjellë pemë, duke i ftuar të gjithë qytetarët të bëhen pjesë e kësaj fushate.
“Edhe Superman nuk ia del dot vetëm, prandaj duhet ndihmë nga të gjithë ata që krijojnë komunitet me shumë dashuri, me shumë pasion dhe shumë përgjegjshmëri. Me këtë aksion të sotëm, ne deklarojmë të hapur stinën e mbjelljeve për Tiranën. Secili mund të mbjellë pemë edhe te pallati, shtëpia, lagjja e vet. Nuk duhet as autorizim, as leje. Po gjetët një vend që është bosh, mbillni një pemë dhe secili prej nesh ka lënë një shenjë në qytet”, pohoi Veliaj.
Drejtoresha e Përgjithshme e Vodafone Albania, Katia Stathaki falenderoi kryetarin Veliaj për bashkëpunimin.
“Faleminderit shumë Erion për mundësinë, për të nisur punën tonë me diçka kaq të mrekullueshme, siç është mbjellja e pemëve, diçka që shikon për nga e ardhmja dhe që na jep shpresë. Kjo është një dhuratë nga stafi i Vodafone për qytetin ku ata jetojnë dhe për Shqipërinë. Kur ne të rritemi, apo të plakemi, këto pemë do jenë këtu për fëmijët dhe kjo është vetëm një pjesë e vogël e asaj çka Vodafone kërkon të bëjë dhe po bën për vendin, si edhe për mjedisin në përgjithësi. Ne e konsiderojmë këtë si një përgjegjësi tonën dhe si pjesë të strategjisë tonë. Tashmë po e shtrijmë nismën e mbjelljes së pemëve, që do të jenë më shumë se kaq, dhe jemi vërtet të kënaqur që ndodhemi këtu. Faleminderit për bashkëpunimin e mrekullueshëm dhe për atë që me shpresë do kemi në të ardhmen dhe do të keni mbështetjen tonë për të gjithë nismat që zbatoni në qytet”, përfundoi drejtoresha e Vodafone Albania.
