Trajneri i Realit të Madridit, Carlo Ancelotti, ka folur në konferencën për shtyp në prag të ndeshjes së kampionatit kundër Sevillas: “Duam ta mbyllim mirë sezonin, do të kemi një ndeshje të vështirë pa Benzemanë, Vinicius Junior dhe Asension”.
I pyetur për sistemin e teknologjisë në futboll ai tha: “Teknologjia është e rëndësishme, me VAR-in shumë gjëra janë përmirësuar dhe rritja e teknologjisë do të ishte pozitive…”. Kurse për polemikat e fundit në Valencia, me kaosin që shkaktoi ‘tekanjozi’ brazilian, italiani e mori në mbrojtje: “Ai nuk udhëton me ne, sepse nuk mund të luajë. Gjuri i tij vazhdon ta shqetësojë dhe ai nuk mund të luajë, pikë”, duke mos e përmendur fare incidentin. Tekniku tha se edhe Hazard e ka vazhdimësinë të sigurt në ekip, megjithëse dëmtimet e panumërta e kanë penalizuar.
Kurse për mbrojtësin Nacho tha: “E ardhmja është në duart e tij, ne tashmë e dimë se si dhe sa mund të kontribuojë, ai ka dhënë dhe ende mund të japë shumë. Klubi po diskuton për rinovimin e kontratës së tij, ai po mendon për zgjidhjen më të mirë. Sezoni do të përfundojë në një javë dhe gjithçka do të bëhet më e qartë”.