Mbi 1800 maturantë kanë shprehur dëshirën për të ndjekur studimet e larta në degën e Mjekësisë së përgjithshme, të Universitetit të Mjekësisë së Tiranës.
Pas mbylljes së aplikimeve me Formularin A2, autoritetet e këtij institucioni të arsimit të lartë publik, kanë zbardhur tashmë listën zyrtare të kandidatëve që do të vijojnë më tej konkurrimin për të siguruar një të drejtë studimi, nga 400 kuotat e miratuara për pranimet e reja në rdahët e kandidatëve brenda vendit në këtë degë.
Ndryshe nga sa ndodh me degët e tjera të këtij Universiteti, për herë të parë gjatë këtij viti, në degën e Mjekësisë së përgjithshme kriter konkurrimi është edhe testimi i informatizuar që do të zhvillohet në Qendrën e Shërbimeve të Arsimit.
Provimi i automatizuar në programin Mjekësi e Përgjithshme, i cili do të ketë 30 për qind peshë në vlerësimin e përgjithshëm, ndërsa 70 për qind do të jetë nga rezultatet e shkollës së mesme, përfshirë këtu edhe rezultatet e Maturës Shtetërore.
Gjatë këtyre ditëve, Qendra e Shërbimeve të Arsimit pritet të shpallë edhe kalendarin zyrtar me datat e testimit për të gjithë kandidatët që janë në garë për studimet e larta në degën e Mjekësisë së përgjithshme gjatë vitit të ri akademik 2023-2024.
p.k\dita
